فوائد ال 27

فوائد ال 27
طبعا كل واحد عنده عربية 127 هيفهم كويس قوى الكلام اللى جاى و هيحس به و اللى مش عنده أهى يا سيدى خبرات تتضافلك ركز معانا إنت بس و هتبقى خبير نوعدك...و هتأخد عربية 127 فى السحب هدية ..
من أهم فوائد السيارة 127

1- تدعيم روح الوحدة الوطنية و التحام الشعوب :
أيوة مستغرب ليه ؟ دى من أهم أسباب تدعيم الوحدة الوطنية العربية 127 هتسألنى إزاى؟؟ أقولك لما تقف منك فى وسط الشارع أو فى وسط الكوبرى ماتتخضتش ولا حاجة دى حاجات عادية و بسيطة كلها و بتحصل متقلقش خالص هيكون السبب يا الموتور يا الدينامو يا المارش هتلاقى تضافر و تلاحم ووحدة الشعوب فى منظر تحسد عليه أى و الله كل اللى حواليك هيجوا يزقوا سواء ماشين قريب أو اللى بعيد هيعدى و يجى يقرب و يزق لغاية لما تدور العربية و تتكل على الله متلحقهش حتى تشكروهم و هم مش زعلانين و إبتسامة النصر و تحقيق الهدف و فرحة الإنجاز تعلو وجوههم .
2- التعرف على المعدن النفيس من الصفيح و الصالح من الطالح :-
هتعرف مين هيساعدك و يفضل معاك من أصحابك اللى راكبين معاك عشان توصلهم فى لفة الميكروباز الشخصى بتاعك (127 ) لما تعطل بيكم فى وسط الشارع أو لما عجلة تنام منك و مين هيخلغ و يمشى و يسيبك و يقولك معلش مستعجل هانزل أركب أنا أى مواصلة و يسيبك فى الطريق رغم أنه بيروح معاك كل يوم ساعتها تعرف العدو من الحبيب و الصديق من المصلحجى و البايع من الشارى و قال على رأى المثل بين البايع و الشارى يفتح الله.....آه
3- تنمية المهارات الإستكشافية : -
تتعرف على مناطق جغرافية جديدة خالص عمرك ماروحتها فى حياتك و هتروحها لأول مرة عشان العربية عشان تغير البطارية وتشترى قطع الغيار و أماكن بيع القطع الإستيراد و فى الحالة دى هتكتسب معلومات و خبرات جغرافية هايلة فى شوارع المدينة و منعطفاتها و أحيائها ده غير كمان أماكن خاصة جديدة زى مثلا منطقة الخراطين لما تلف كده زى الشاطر على قطعة غيار و ماتلاقيهش و ينصحك الميكانيكى الناصح الأمين إن الحل الوحيد نُخرطها و أكيد هنخطرها عند الخراط و الخراط فى موجود فى أماكن محددة ده غير طبعا غرفة تغيير الزيت و ضبط الزوايا اللى هتتعرف علهيا فى محطة البنزين أو (البنزينه) و هتتعرف على أحدث التكنولوجيا الإلكترونية على الشاشات قدامك.
4- تنمية مهارة اللغة:
هتنمى عندك مهارة اللغة و هتتعرف على مصطلحات جديدة نوفى زى بوجيهات ، كتاويت ، طرمبة ، سلندر ،شربون ،مارش، باكم ،ريدياتير ، كاربيرتر،اسبراتير ،كوبلن ، عمود كردان ، أبلاتين و منه أُشتق القول الشهير " أبلاتينه لدع " أى لسع لأنه دائما ما يلسع منك فى نهر الطريق ، شكمان، رفرف، أفيز، شنبر، فتيس ، أكسيليتور، طاسات ، باكتات ،قطاويش ،موبينه ، شاسية ،طنبورة ، كوندسر ، جنوط، كبوت و ده هيثرى الثروة اللغوية عندك إلى أبعد مدى .
5- تنمية المهارات الحركية:
هتكتسب مهارات حركية ميكانيكية لا بأس بها من إنك لما تعطل منك تنزل و تَلَمَسْ بوجية أو قطافش أو تنضف إسبرايتير أو مارش أو تَلَمَسْ سلك مروحة ولا ترموستات أو حينما تنام منك فردة كاوتشك فتنزل و معك مفتاح الصليية فى يد و الكوريك فى الاخرى وتبدأ فى الفك و التركيب و فى الحالة دى هتكتسب خبرات عظيمة لا بأس بها .
6- تنمية المهارات الإجتماعية و الذكاء الإجتماعى : -
أ‌- التعرف على أصدقاء جدد :-
لأنك هتتعرف على أصدقاء جدد و هتّكون صداقات مختلفة مع مختلف الفئات زى الميكانيكى ، السمكرى، كهربائى السيارات ، بتاع الدكو ، بتاع الشكمان، بتاع الردياتير ، و متخصص العفشة و سروجى السيارات و تثقلك بكل المهارات الأجتماعية اللازمة و الذكاء الإجتماعى مثل :- يا رياسة ، و يا باشا ،، يا هندسة ،، يا باشمهندس ،، يا عمنا ،،يا عم الأسطوات و الله ينور إلى أخره .
ب‌- كيف تكون عِشَرِى : -
تكتسب مهارات إجتماعية و تتعود الألفة و تألف الأخرين بسهولة حينما تنفذ المياة منك و تقف أمام أى محل أو دكان و تقولهم سلام عليكم عندكم ميه؟ أو أمام أى بواب عقار متعرفوش و تقوله : سلام عليكم عايزين ميه يا حاج الله يكرمك !!
و كذلك تتعلم أن تكون عِشَرى وألا تهاب الوحدة أو الوَحَشة
فحينما تقف منك فى مكان هِوّ أو مهجور أو فاضى لا تقلق و تنزل لتبحث عن أقرب عَمَار أو منطقة آهلة بالسكان أو أن تكون أكثر جراءة إجتماعيا و أكثرعِشرية حينما تقف منك الساعة 7 صباحا فى يوم جمعة والا أجازة رسمية أو تنام منك عجلة و لا تجد صريخ ابن يومين فتنزل تبحث عن أقرب قهوة و تدخل بإبتسامة بلهاء ساعة صبحية و القهوة أصلا مفيهاش اتنين تلاتة على بعض و تقول بعشم جامد سلام عليكم ممكن حد يجى يزق معايا و أنت لا تعرف يا ولداه إن القهاوى صباحا فى هذا الوقت المبكر لا تلم إلا المساطيل و الحشاشين أو كبار السن الناس بتوع زمان اللى إتعودوا يصحوا بدرى فيجيبوك فورا : كان بودنا يا ابنى و يعتزر أحدهم بالقلب و الأخر بالسكر .....!!
أو تكون عشريا بزيادةو تقف على بعد خطوتين من العربية تشاور لأقرب تاكسى و حينما يقف لك تقوله صباح الخير يا أسطى ممكن تيجى تساعدنى
7- إكتساب مهارات موسيقية:-
طبعا بتكتسب مهارات موسيقية و بتثقلك بالأذن الموسيقية الحساسة مرهفة الحس للتمييز و التفريق بين صوت الموتور لما يعلى و صوت الشكمان أما يفك و صوت الكابلن لما رلمان البلى بتاعها يفرط و صوت عمود الكردان لما يزيق أو مسمار العجل لما يصفر .
8- تنمية المهارات الرياضيةو خاصة السباحة :-
تقوم بإثقالك باللياقة البدنية العالية و الليونة فى العضلات من خلال تمرينات رياضية معينة :-
أ‌- تمرينات خاصة بالأكتاف و الذراعين :حينما تستخدم الكتفين و الذراعين فى لف الدريكسيون كله يمين و كله شمال فى آن واحد يجى سبع ،8، تسع مرات كده عشان تركن فى حتة قد كده ( صغيرة جدا يعنى ) أو تطلع برضو من حته قد كده( نفس المساحة السابقة ) لأن قدامك و وراك عربيات راكنة لازقة فيك تماما و ذلك لعدم توافر أى مكان فاضى فى البلد .
ب_ تمرينات خاصة بالأرجل و الذراعين و ممارسة الجرى: و ده لما تنزل تتريض كده و تزق العربيات اللى راكنين حواليك اللى وراك و اللى قدامك و اللى جنبك عشان قافلين عليك و مش عارف تطلع بس إدعى ربنا يكونوا "ممورين" العربية و غالبا الشهادة لله يترك أصحابها العربيات " ممورة " و ذلك لبروتوكول ضمنى متعارف عليه سيارتياً ألا و هو إذا حد راكن و لازق في العربية تماما أو قافل عليك صف تانى أو ثالث أحيانا فإنه لابد - كده من نفسه - من أن يترك العربية غير معشقة " ممورة يعنى " و ذلك لنفس السبب السابق ( راجع المبدأ رقم 8 ب ).
ج - مهارة السباحة : و ذلك لأنها بتزودك بعوامات مخصوصة مصنوعة من الشنابر القديمة للأطارات بعد معالجتها و تبقى ميه ميه فى السباحة .
9- ترسيخ مفاهيم أخلاقية و مبادئ عامة :
أ- مفهوم التعاون :-
ترسيخ مفهوم التعاون كما ذكرنا سابقا- انظر الفائدة الأولى نفس المرجع - حيث تجد كل من حولك يساعد و يشاركك سواء فى " الزق " أو فى إحضار المياة لما الردياتير يتخرم منك أو تتأكل طرمبة المية و العربية تسخن و تدخن و تطلع دخان و خلاص هتولع تتجلى الروح المصرية الأصلية فكل من بالشارع يصيح بك صيحة مدوية ووووووووووووقف و يجرون عليك ليخروجك من السيارة و يفتحوا الكبوت و يتسارعوا فى إحضار المياةو رشها و ملء الردياتير مرة أخرى و اللى يديك موبايله و يقولك أتفضل إتصل بحد طيب يجيللك و اللى يطلع من عربيته ميه و يديلك و اللى يجرى يطلع طفاية من عربيته ناس محترمةو أصيلة مأصلة صحيح فيظهر المعدن الأصيل لهم من المعدن التفصيل ( راجع مبدأ رقم 2 )
ب - التأكيد على مبدأ " قطرة ماء تساوى حياة "
حيث يتضح من المبدأ السابق أنك أحيانا كثيرا تكون أحوج ما تكون لقطرة الماء لتنقذ نفسك و حياتك و الأخرين و تقدر جيدا قيمة الماء .
ج - الإعتماد على النفس و إستئناس الوَحشةو عدم الخوف من المستقبل أو المجهول :-
فحينما تتعطل بك فى مكان غريب أو بعيد أو مِتطرف أو طريق سريع لا تخف و إتكل على الله و سمى كده و أقرأ المعوذتين و إنزل دورعلى أى مساعدة أألف المكان لا تخاف من المجهول ... لا تهاب المستقبل ...لا تخاف مما لا تعرفه ..مما يخبئة القدر إتكل على الله ...فتترجل كالفارس المغوار و تنزل و الطريق فاضى .. الرب واحد و العمر واحد ...هى موتة والا أكثر و هى شجاعة تحسد عليها
د- الشجاعة و الإقدام و المغامرة :-
د. أ - فمن المبدأ السابق تتجلى روح المغامرةو الشجاعة فى أسمى معانيها و صورها حيث ترجلت عن سيارتك فى منطقة مقطوعة بحثا عن السند و العون . فعلا رمز الفارس الشجاع المقدام
د.ب - الشجاعة و الإقدام خاصة فى مواجهة النظام :-
لما تعطل على كوبرى و خلاص الموكب هيعدى و الضابط يجى يزعقلك و يقولك يالا يالا امشى من هنا و تقف بكل جسارة كوحش كاسر وبصدر جامد تقول للضابط : وأنا أعملك إيه يعنى؟؟ و تقولها و أنت تنط و محروق دمك و متسشيط غضبا و مستبيع كمان فى ذلك الوقت : عطلت... عطلت؟؟
هـ - أهمية روح المؤازةو لو معنويا :
لما تقف بيك على الكوبرى وتنزل بقى تَلَمس البوجية اللى نط ما أنت إتعلمت بقى ( راجع مبدأ تنمية المهارات الحركية نفس المرجع النقطة 5)تلاقى بقى الشباب اللى راكب العربيات و معدى بسرعة من على الكوبرى بيحيك تحية كبيرة قوى و اللى يرفعلك إيده بعلامة النصر و اللى يضم قبضة ايده رافعا الإبهام بكل عزم و هو يطبق عليها و يقولك ايه كددده!! أحسن شباب ॥فعلا من غير مؤازراتهم و دعمهم كنت هتعمل إيه ؟؟!!
10تنمية المهارات الفنية و الذوقية و الجمالية :-
تساعد ال 127 على تنمية المهارات الفنية و الذوقية و الجمالية و إثراء الحس الفنى المُطعم باللمسة الفنية الراقية ذات الذوق الرفيع فى تركيب " إستيكرات " على مناطق الخدوش و التجريح التى نتجت عن الإحتكاكات و الحوادث أو" مطواى " أولاد الشوارع و إخفائها بمهارة فنية عالية تجعلك لا تراها بالعين المجردة و كذا التفنن برشّ أماكن رد الصاج على البارد أو الساخن بالألوان المختلفة للإسبراى و عمل لوحات فنية و رسومات رائعة الجمال و الفن و التشكيل من أروع ما يكون .
11- تنمية المهارات الكشفية :-
تكتسب مع الوقت مهارات كشفية رائعة تؤهللك أن تنضم للكشافة و المرشدين بجدارة
أ‌- مهارة العقدة :-
فلابد من توافر وجود حبال لزوم الجر و السحب عند اللزوم و عقد الحبل عقدة متينة متخرش المية فتجيد العقدة الوتدية و الخبلة كعقدة الكشافة تماما ب‌- مهارة الفك و التركيب و التجميع : -
ناهيك عن مهارات فك و تركيب إطارات السيارة و إستعما ل الكوريك و المفتاح الصليبة( كما ورد سابقا فى المبدأ 5 ) و وجود عصا من الخشب لرفع الباب الهاتشك باك إذا ما تعطلت المساعدين و المفصلات لدعمها بها .
ج-مهارة التخييم أو المعسكر :
حينما تجد أنه مفيش فايدة من كل المحاولات السابقة فتتصل بالميكانيكى أو بسيارة الإنقاذ أو حتى رقم أقرب ميكانيكى لك من الدليل و تعسكر و تخيم فى مكانك فى الطريق فى عز الحر صيفا أو عز البرد شتاءا.
د‌- و أخيرا المهارات الإستكشافية الجغرافية و تحديد الإتجاهات و التجوال و التنقل و التعرف على أماكن جديدة
(السابق ذكرها فى النقطة رقم 3 من المرجع ذاته) بالإضافة إلى كل ما سبق كلها مهارات تؤهللك بجدارة للإلتحاق بالكشافة.
12- تنمية المهارات المنطقية كالإستقراء و الأستنباط :
تنمية المهارات المنطقية فى إستقراء و إستباط المشكلة و العطل فإذا أضاءت اللبمةو لم تدور السيارة فالعطل فى الموتور و إذا لم تضئ فالعيب فى البطارية أو المارش أو الدينامو أو الكتاويت و إذا نطت منك فهو البوجية أو الفيتس و إذا قّطعت فى الطريق فهو الكاربيرتير وإذا انحرفت قليلا فهى علبة الدريكسيون أو إسطوانة الدبرياج أو الكابالن و إذا أصدرت أصواتا لابد من إستنتاج و إستنباط مصدر الأصوات الصادرة ( برجاء العودة الى نقطة 7 المهارات الموسيقية نفس المرجع ) و حينما تقف صيفا تستنتج أن ذلك لسخونتها و شتاءا للبرودةو تمليح القطافش بتفقش .
13- تنمية المهارات و القدرات العقلية كالتركيز و الذاكرة :-
(بند خاص بالنساء يسرى على جميع أنواع السيارات )
أ‌- تنمية مهارة الإحساس بالسرعة و التوازن حيث بعد فترة ليست بالقلية من السير ببطء يبدأ تدريجيا العقل فى إستيعاب السرعات و إختلافات و زيادة السرعة نسبيا لعمل التوازن المطلوب .
ب‌- القدرة على تحديد الإتجاهات ( و هى من أعمال الكشافة راجع المبدأ 11) و إستخدام الإشارات اليمني فى اليمني و ليس فى الشمال كما يحدث دائما و العكس و كذا مهارة تذكر إستعمال الإشارات من أساسه مما يساعد على تنمية مهارة التذكر و التركيز أيضا .
ج- مهارة إيجاد إستخدامات عقلية منطقية أخرى للأشياء مثل مهارة النظر فى المرآة لأغراض أخرى غير تصليح الماكياج و عدل لفة الطرحة و خاصة فى المرايات الجانبية و الخلفية و المحاولة المستميتة المتكررة لتذكر ذلك مما يدعم تنمية مهارة التذكر.
د- مهارة تقدير المسافات جيدا حيث بعد مدة من القيادة يبدأ قائد المركبة فى التقدير الصحيح للمسافة بين سيارته و السيارة التى أمامه أو بينه و بين الرصيف أو العمود أو الشجرةو عدم "الطس " المباشر فيها كما كان يحدث فى السابق دائما و محاولة التركيز فى ذلك بإستمرار مما يدعم تقوية مهارات التركيز .
هـ- مهارة تذكر أخذ الغيارات المختلفة للفتيس بدلا من ترك السيارة يطلع عينها و تسحل و هى على الأول فى المحور أو عدم وجود سحب لعدم أخذ الرابع و مع الوقت تننمى مهارة التذكر و التركيز فى هذه النقاط .
و-نفس المهارات السابقة فى تذكر شد" الهاند بريك " أو الفرامل فى المَنازل و عدم ترك السيارة تجرى للخلف لوحدها أو تَتُطس فى اللى وراها و تكسرله فانوسين.
و كذا إستخدام نفس المهارتين السابقتين ( التذكر و التركيز ) فى عدم الضغط على البنزين فى المنازل أو المطبات وتجنب الضغط على البنزين بدلا من تهدئة السرعة و عدم نسيان الضغط على البنزين فى المطالع .
ز- تقوية التوافق العضلى العصبى ما بين الضغط على البنزين و الرفع من الدبرياج فى مهارة تستغرق بعض الوقت بكل تأكيد।
ح – إكتساب مهارة ال " سينس" أو الاستشعار بالطرق و المسافات و الأبعاد و الإتجاهات و قدر الضغط و تدفق البنزين و هذه قدرات يقوم بها العقل اللاوعى أو العقل الباطن .
كلها حاجات بسيطة يعنى يا جماعة للتذكرة فقط .
14- إكتساب صفات حميدة كالصبر و الإيمان بقضاء الله و قدره :-
فبعد كل هذا لابد لك من إكتساب صفات مثل الصبر لتزيد قدرته عليه و ترفع من درجات الجلد و التحمل و ترسخ مبدأ الكفاح فى الحياة . و تزداد درجات الايمان عندك بقضاء الله و قدره حينما تنزل صباحا فتجد العربية مكسور فيها فانوس أو مراية أو مساحات أو إكصدام نتيجة حد كان بيركن و مش عارف أو نتيجة رذالات و سخافات بعض البشر اللى مش عايزينك تركن هنا أو لأنك تعديت على مكان ركنهم و تزداد أقصى درجات الإيمان بقضاء الله و قدره عندك حينما تنزل فى يوم فتجد العربية متخرشمة و مدشدشة و لاتصلح للإستخدام الآدمى مرة أخرى لأن لورى معدى سائقة ولد مبرشم عامل دماغ أكيد فى سيجارة بنى قد دخل فى العربية و هى قابعة فى مكانها مسالمة فى حالها على الرصيف مركونةو قد تحولت الى مجموعة من الأشلاء و الأطلال كل حتة موجودة لكن فى حتة و هرب و لا يوجد شهود عيان فترتفع عندك معدلات الإيمان و الرضا بقضاء الله و قدره و تعلم جيدا إن كل شئ ممكن يروح فى ثانية و ما دايم إلا وجه الله سبحانه .
15- الحصول على الألقاب و الشهرة و ذيع الصيت :-
أنك بدل ما يبقى اسمك مثلا محمد أحمد لأ يبقى محمد بتاع ال 27 الحمرا أو البيضا أو سيد بتاع ال 27 الزرقا أو الصفرا أو مدام نهى بتاعة ال 27 البمبى أو السيلفر و هكذا يصبح لك لقبا و كنية و تُعرف فى الشارع كله و تزداد شهرتك و يذيع صيتك لأن حتى اللى مكانش عارفك قبل كده هيعرفك دلوقتى أولا داخل خارج بال 27 ثانيا أما أى حد بحب يعمل فرح أو عزا فى الشارع بيندوا عليك و يبعتولك عشان تغير مكان العربية و لو محدش يعرف مين صاحبها يفضلوا يدورا و يسألوا مين صاحب ال27 لحد ما واحد ابن حلال يدلهم على محمد بتاع ل 27 الحمرا .
16- الزهد و القناعة و التواضع :-
إن مفيهاش طمع يعنى لو الأكرة مكسورة و طنشت تصلحها ممكن تسيبها عادى جدا فى الشارع من غير ما تقلق لأن الحرامية بيزهدوا فيها بإستثناء الكاسيت يعنى و أنت نفسك بعد اللى شفته معاها بتكره العربيات كلها و بتزهد ونفسك بتعف الصنف كله و بتفضل المواصلات على شراء عربية جديدة .
ولما تروح فرح فى الهيلتون والا الشيراتون و تركن ال 27 و تخرج تدور عليها متلقيهاش تبدى تقلق و فى الأخر تلاقيها موجودة بس مكانتش باينة من كل العربيات الفاخرة اللى حواليها و من المارتركس اللى قدامها و الجولف اللى وراها يبقى فعلا تشعر بالقناعة و تشعر بقيمة الرضا بالمقسوم عبادة و من تواضع لله رفعه و تشكر ربك على نعمته عليك و حينما تذهب و أصحابك إلى مطعم فايف ستارز فتركنها و عند الخروج تبحث عنها إنت و كل أصدقائك و فى الأخر تطلع برضو مش باينة فى وسط العربيات الأحدث موديلاً فيدخل أصدقائك فى هستيريا ضحك عمقية و هم يقولون لك : إيه الحسنة اللى طالعة للعربيات دى؟؟؟ .
17- الإستغناء و الحماية :-
بعد كل ما سبق إتضح إن ال 27 لها فائدة عظيمة مهما قلت و الله مش هأقدر أنكرها أو أوفيها حقها و هى إن " حمارتك العرجة تغنيك عن سؤال الليئم " و بالتالى بتستغنى عن أى حد يتألط عليك أو يتكبر أو يتطفل و يزعجك أو يقلل أدبه عليك فى الأتوبيس أو الميكروباصأو حتى الطريق و بتحمى نفسك من سخافات كتيرة فى الطريق و المواصلات و رزالات البشر .
و ربنا يغنينا بالحلال و يوسع علينا و يبارك لنا فيما رزق اللهم آمين
فاطمة عبد الله
إهداء إلى رفيقة الكفاح زقزوقة