الجمعة، 13 يونيو 2008

باركولى رحت مطعم من ابو مينمام تشارج

ربنا كرمنى زى باقى البشر اول الشهر و قبضناو قلت اناو اصحابى نروح بقى نرفهه عن نفسنا مهو اول الشهر و اول الشهر مش بيجى الا كل اول شهر يعنى من الشهر للشهر:)
قلنا نروح مطعم من المطاعم الفايف ستارز بتاعة الناس الهاى كلاس نروح بقى و نتفرج على العالم الاخر و الزاوية الاخرى من الرؤية و طبعا كل الاحداث دى متزامنة مع مذبحة غلاء الاسعار اللى تخطت مذبحة القلعة اللى سال فيها دماء المئات من المماليك تفوقت عليها مذبحة الاسعار اللى سال فيها الاف الجنيهات من جيوب المواطنين و اسُتنزقت حتى اخر مليم مع الاعتذا ر للميلم لانه لم يعد يستخدم من قديم الازل؟؟
المهم رحنا و قعدنا ندورعلى اسماء المطاعم كلها و سألنا الدليل اية هى المطاعم الفايف ستارز و خدنا التليفونات و العناوين و فضلنا نتناقش كعادة الاخوة المصريين كلهم يجى ساعتين عشان نقرر هنروح اى واحد ( اومال اية الدقة مطلوبة افهمومها بقى)و فين و فين لما توصلنا للمطعم اللى وقع عليه الاختيا ر من قًًِبل لجنة فحص العرض الفنى و المالى بعد السؤال و الاستفسار من اللى راحوا قبل كده أو من المطاعم نفسها بالتليفون المهم وقع الاختيار على المطعم و كان فى احد الاحياء الراقية بالقاهرة من ابو مينمام تشارج و المنيمام تشارج للى ميعرفهاش هو الحد الادنى لطلبات يعنى حتى لو رحت و مطلبتش هتدفع الحد الادنى ده اللى غاليا هيكون مبلغ يعنى مش اى كلام و طبعا احنا لا عمرنا روحناه و لا شفناه اتصلنا بالتليفون عشان يوصفولنا العنوان و محدش يضحك؟؟ اومال نتوه يعنى ؟؟بس فضلنا نسأل و نبحث لحد ما لقينا الشارع عرفناه لوحدنا لقيناه شارع محترم و مليان اشجارعلى الصفين و هادئ و عربيات من افخم و احدث الماركات راكنة على الصفين و مفيش مكان لعجلة حتى و تقولى البلد فيها أزمة ازمة مين يا عم الحاج؟؟اللى يقولك البلد فى ازمة اقلع و اديله بالجزمة على رأى المثل الشعبى الشهير نرجع تانى لرحلة الفضاء ابللو 9 قصدى رحلة المطعم مش هانكر وقفنا شوية نتفرج على العربيات المركونة على الصفين و بعدين رحت انا و اصحابى المطعم الفايف ستارز و دخلنا عادى جدا الاضاءة اية؟؟ و الانوا ر اية؟و كل حاجة نظيفة و جميلة و مرتبة و ديكورجميل و استقبال رائع و موسيقى هادية و بصراحة كل حاجة مبهرة
العجيب بقى اننا ندخل و ندور و نبحث و ندور و نبحث على مكان نقعد فيه و ادى وش الضيف؟؟ مفيش
المطعم يا حضرات ارش كمبلية يعنى لمن لا يعرف الفرنسية زى حالتى يعنى الصالة مالية كامل العدد المهم نبص لبعض : يعنى هنرجع تانى لا طبعا احنا قتلى بقى انهاردة مش هنضيع الخروجة بعد ما جينا اتمشينا شوية بين الترابيزات لعل و عسى الفرج يجى و حد يقوم
المهم فى رحلتنا فى البحث عن ترابيزة فاضية انظر يمين الاقى شباب اخر روشنة تى شيرتات مقطعة اية ؟؟ ( موضة طبعا للجهلة امثالى و انا ايش عرفنى انا باخر صيحات الموضة)
انظر شمال الاقى شعور واقفة ازاى معرفش زى المقشات المعمولة من جريد النخيل شعور واقفة لفوق يجى 3 متر ازاى موقفينا كده ( قلنا الجهلة زى حالاتى ايش عرفهم باخر صيحات الموضة) قلت اسكت و انا مالى
اتمشينا شوية كمان الاقى شباب مجموعة كبيرة جايبن سوا و شكلهم كده ولاد ناس ( مش عارفة اية ولاد ناس دى هى بتتقال كده يعنى احنا الى ولاد حاجة تانية) المهم جايبين معاهم كتب قال اية جايين من الجامعة الخاصة بيذاكروا ( ربنا معاكم يا حبايبى و ينجحلوكوا المقاصد)
امشى شوية الاقى واحد كده شكلة راجل اعمال و معاه واحدة فى منتصف العمر شكلها برضة سيدة اعمال يمكن هو ده غذاء العمل الى بيقولوا عليه يمكن!!!!!
المهم اتى الفرج من عند ربنا فى ترابيزة قامت
جرينا زى الى بيلحق كرسى فى الاتوبيس على الترابيزةو هجمنا على الناس و هم بيقوموا و طبعا كان شكلنا بيئة قوى هنعمل اية عض قلبى و لا تعض رغيفى ( كنا جعنا بقى)؟؟؟

الجارسون بكل احترام جه شكله خريج جامعة طبعا زى حالتنا مهى دى الوظائف المتاحة لخرجين الجامعة حاليا المهم جه بكل ادب و احترام ادلنا المنيو و مشى......
كل حد فينا مسك المنيو و قعد بقى يتفرج و يقرا و يقلب فيها الحمد لله الجهل يعنى موصلش معانا للدرجة الفظيعة المريعة احمدك يا رب اه صحيح عارفين نقرأ اسماء الاطباق اللى هى بالانجليزى طبعا مهو انا نسيت اقول اصل احنا جهلة ماركة دارسى لغات ما علينا
ربنا وفقناو قرأنا كل الاسماء الموجود ايشى تشيكن مكسيكن و ايشى تشكين ال جريك جريلد جريج سلاط
اه و الله اسم اكله
و كمان باستا بالمشروم و المكسيكن سلاط الى هى يعنى مكرونة بالصلصةو السلطة بس طبعا لازم الانجليزى اومال قعدة الخواجة عملوها ليةو الا المنظرة الفارغة و الانعرة الكدابة موجودة لية؟؟
و شوفوا بقى العرض الفظيع المريع اللى جاى اهو الاوفر الى معمول اى طبق معاه اختايرى حسب رغبتك سايد دش ( طبق جانبى يعنى)
المشكلة بقى اللى واجهتنا اننا اه عارفين اسماء الاطباق بس مش عارفين عبارة عن اية و الا معمولة من اية؟؟؟
و طبعا فى ناس رجحت انها تختار اقرب الاسماء المعروفه انطلاقا من مبدا الى نعرفه أحسن من اللى مانعرفوش؟؟
وناس تانية رجحت انها ممكن تجرب ما هى خروجة بخروجة و فلو س ضايعة بفلوس ضايعة و اتكلت على الله واختارت صنف غريب من الاصناف العجب اللى موجودة!!!
أما انا اخدتنى الجلالة و قلت فيها اية ؟؟ عجبنى شكل طبق ندهت على الجارسون و سالته دى عبارة عن اية و الشاب تفضل بكل ذوق و ادب مشكورا و جاوب على السؤال الفنان بتاعى و بعدها سألنا عن طلباتنا قلناها....
قعدنا بقى نتفرج على اللى حوالينا كلهم فى عالم تانى اللى بيكلموا عن مصاريف الجامعة الخاصة اللى غليت
و اللى بيكلموا عن اكل الكل ب و القطط اللى غلى يا عينى يا حرام؟!!!!
و اللى جاب سيرة الشقة التمليك اللى اضحك عليه فيهاو خدوا 200 الف زيادة يا حرام يا عينى ؟؟ اومال الشقة نفسها بكام؟؟؟
و اللى قال انه حجز شالية فى مارينا بس دى فرصة هايلة ، لقطة، جتله من عند الله لانها بالتقسيط المريح جدا
ربع مليون فى السنة بس تصورا مش ممكن مش معقول؟؟؟ فعلا لقطة؟؟!!؟؟
و جاء الاكل.... بصراحة بصراحة كان شكله رائع الدكورات بقى عاملة حركات و طعمه كمان كان هايل و معاه سلطات و صوص و حاجات كتيرالحمد لله شبعنا من نصف الطبق لان كلنا حسينا فعلا إن الاكل علية دهون كتير أو مواد معينه عشان يسبب الشبع
بس طبعا على مين ده لسة الطبق بحاله هناكله يعنى هناكله اومال اية ؟؟هنفقل الاوضة بالترباس و تتاكل يا عباس
حاولنا حاولنا معرفناش؟ باءت كل المحاولات بالفشل
نعمل اية؟؟؟
قلنا نضحى و خلاص و نسيب الطبق و نعمل فيها احنا كمان حركات زى الناس الى بتسيب نصف الطبق مليان و تمشى
نظرت حولى و لاحظت حاجة غريبة لقيت كل الناس اللى حوالينا اللى برضة مقدروش يكملوا الاكل طلبوا يلفوه تيك اواى عشان ياخدوه معاهم ... الله ؟؟ الله يا للعجب العجاب مهم دول نفس الناس اللى دلوقتى كانوا بيكلموا عن ارتفاع اسعار اكل القطط و الكلاب و ارتفاع اسعار الشالياهات فى مارينا ؟؟ مهم اهم بيخافوا على الفلوس و المليم و السحتوت كمان اهو و عارفين اهميتها و مش زى ما بيصورهم فى الافلام الناس اللى بتسيب الطبق كله مليان و تمشى اومال اية؟؟ يعنى احنا بقى اللى مستغنين عن الفلو س و هنسيب الاكل.... لأ بقى؟؟؟؟
اخدتنى الجلالة تانى للمرة التانية و نديت على الجارسون : من فضلك عايزين نلف الاكل تيك اواى
رد بكل ادب و ذوق تحت امرك يا فندم
اى خدمة تانية!! قلنالوه شكرا و قعدنا شوية نكلم
و احنا قاعدين لقينا اطباق حلويات شهية من كل نوع معدية جنبنا اللى ورانا و اللى قدمنا من كل ناحية بقينا محاصرين
الفروت سلاط من ورائنا و الايس كريم و الشيكولات لافرز من امامنا ؟؟؟؟؟
ماقدرناش نقاوم.....قلنا نحلى بقى؟؟؟
ايوة كنا شبعنا بس طفاسة ..تقولوا اية بقى؟؟؟ هو احنا بنروح هناك كل يوم من نفسنا بقى!!! نفس اللى حصل فى الجولة الاولى حصل فى الجولة التانية!!!
مينو الحلويات لوحدها مليانة اسماء من كل نوع تشيكوليت لافرز و شيكولات مادنيس؟؟؟؟؟
يا خبر يا ولاد هى التشيكوليت كمان اتجنننت ؟؟؟؟ على حد معلوماتى اللى من القرون الوسطى إننا كنا نعرف ان الطماطم و الباذنجان بس هم اللى بيتجننوا بامأرة النداء الشهير مجنونه يا قوطة؟؟؟
المهم قررنا نتجنن زيهم و اختارنا تشيكوليت مادنيس.....
و جاء الطلب،،،
بصراحة شكله كان فظيع يفتح النفس ....اكلناه.....
و قعدنا نكلم شوية
ثم جاءت اللحظة الحاسمة؟؟ تن تن تن تششششششششششش
شيك الحساب
قلنا هنروح بقى؟
طلبنا الحساب
و جاء الجارسون بنفس الذوق و الادب المعهود منه
و قدم لينا الشيك و مشى،،،
نظرنا جميعا للشيك للمرة الاولى واعذرونا من هول الصدمة و المفأجاة صمتنا للحظات ثم انفجرنا جمعيا فى ضحك هستيرى أصل المبلغ يا حضرات كان من العيار التقيل قوى قوى
بس و لا يهمكم ربنا سترها مش هنغسل الصحون و الا حاجة جيب السبع مايخلاش برضة انا مش قلتلكم على كل حاجة فى الاول
إننا فى أول الشهر و معانا المرتب قصدى المرحوم اللى كان مرتب الله يرحمه و يحسن إلية،،،
طبعا كله طلع الموبايلات و بدأ فى حساب كل فرد مهو آه اصحاب و حبايب بس ماتوصلش للدرجة دى كل واحد يدفع لنفسة آه انجليزى يا عزيزى؟؟؟؟
و كل شوية نحسب و نغلط و نحسب تانى مهو احنا مش متعودين على المبالغ دى كبرنا مبلغ الدليفرى بتاع سندويتشات الفول و الطعمية اللى بنجيبها فى الشغل!!! بصراحة كان منظرنا بيئة بيئة يعنى منظرنا كان مسخرة من الاخر يعنى
و كل شوية حد يطلع الفلوس و التانى يفك و يدليه الباقى و هكذا و نقسم و نطرح و نجمع لغاية ما ربنا كرمنا و وفقنا و قدرنا نضبط الحساب... أحلى حاجة بقى إننا لقينا الحساب ناقص جنية و قعدنا نحسب تانى من الأول و نقسم الجنية ده على بعض مش باقولكم منظرنا كان بيئة قوى :)المهم الحمد لله كمل المبلغ مش عايزة اقول كام ؟؟؟ حفاظا و حرصا على صحتكم الغالية لعدم توافر عربات اسعاف قريبة من هنا.....
المهم تشجعت أنا شجيع السيما أبو شنب بريمة و اخذتنى الجلالة للمرة التالتة كده و قلتلهم مش هندى الجارسون تبس( بقشيش يعنى) جنية ولا حاجة يا ولاد!!!!!
بصولى كلهم شذرا و غضبا و سخطا و جزعا و كل الحاجات مع بعضيها و قالولى اية نعم؟؟؟؟؟؟؟؟؟
سكتت و حطيت لسانى فى بقى
قالولى مهم واخدين 20 جنيه خدمة هنديهم اية تانى اكتر من كده؟؟؟؟
تركنا الحساب و مشيناو كل واحد ماسك كيس التيك اواى البلاستيك علية اسم المحل فى ايدية للذكرى الخالدة طبعا مهو يا عالم اذا كنا هنشوفه تانى والا لأو مشينا و احنا فى كريزة ضحك......
نسيت اقولكم طبعا اتصورنا و جنب اليافطة كمان اثبات قانونى يعنى و كمان اخدنا المناديل و اكياس المناديل المعطرة اللى عليها اسم المحل للذكرى برضة اومال اية يا جماعة باقولكم فايف ستارز من ابو مينمام تشارج..........اومال اية ؟؟احنا بنلعب؟؟؟
و اول ما خرجنا بصينا لبعض و قلنا مين صاحب الاقتراح ده و كنا عايزين نطبق فى زمارة رقبته .......بصتلهم و قلتلهم : ابقوا قابلونى لو جينا هنا تانى هى مرة فى العمر و خلصت خلاص .....
ابقوا احدفونى بالطوب لو فكرت اعمل كده تانى قال مطعم فايف ستارز قال؟؟؟؟
بس السؤال اللى هيجننى؟؟؟ دا احنا أصلا ملقيناش مكان و تقولولى البلد مفيهاش فلوس مين اللى ضحك عليكم و قالكم كده و تقولى أزمة؟؟أزمة مين يا حضرات ؟؟؟
قال مطعم هاى كلاس مينمام تشارج قال بلا ارف؟؟ ماله اكل امى ماله زى الفل
تحياتى،،،،
ربنا مد فى عمرى و شفت المطاعم ام مينمام تشارج

رضا ولا حاجة تانية؟؟

أوقات كتيرة نسأل نفسنا الى انا فيه ده رضا والا استكانة؟؟ راضى و لا عايش و السلام؟؟باسعى و باحمد ربى و الا خاضع و خانع؟؟؟؟
مش بتسأل نفسك برضة نفس الأسئلة؟؟
الرضا بالمعنى الصحيح للكلمة بكل ما تحمل من صفات سامية هو فضيلة بكل المقاييس
و لكن مع اختلاف تفسيرات و تأويلات هذا الزمان أشك فى أن الكلمة أصبحت تحمل ذات المعنى.....؟؟؟؟
لا أحد ضد التغيير نحو الافضل فهو غاية الشعوب و غاية الانسان و غاية الحياة طالما هناك حياه( التغيير نحو الأفضل)تلك الكلمة الساحرة التى يحلم بها الجميع على مختلف مستوياتهم الاجتماعية و رؤاهم الفكرية ألا يحلم الإنسان أى انسان بحياة أفضل ألا يحلم المواطن بحياه كريمة ..ألا يحلم طفل الشارع بأسرة و مأوى ..ألا يحلم الجاهل بالعلم ..ألا يحلم صاحب المال بزيادة أمواله...ألا يحلم الموظف بوظيفة أفضل او بأدارة احسن و ألا و ألا ألف ألا....و ألف تساؤل و تساؤل......
ألا يحيا الإنسان فانيا عمره كله فى البحث عن الأفضل ؟؟؟إذن الطموح و التطلع ليس بجريمة بل إنه من صفات البشر
و السؤال الذى يطرح نفسه و بشدة؟إذن متى يصبح هذا التطلع و الطموح ندا للرضا؟؟
الإجابة فى نظرى : عندما يتحول هذا الطموح إلى وحش ضارى يأكل كل ما أمامه؟؟
عندما يتحول الطلب إلى إدمان ..إلى رغبة لا يمكن إيقافها أو جمحها و يستخدم صاحبها كل الطرق الممكنة و غير الممكنة ،، القانونية منها و غير القانونية ،، الشرعية منها و غير الشريعة للحصول على مطلبه؟؟؟
عندما يصبح الشغل الشاغل هو عدم الاكتفاء بل الزيادة للزيادة فقط...
عندما يتغير فى هذا الزمان مفهوم الرضا و يحتمل أكثر مما يحتمل من تأويلات أخرى و تفاسير مياكيفالية تحمل فى طياتها ذلك المبدأ الخبيث الغاية تبرر الوسيلة - مهما كانت الوسيلة ؟؟
و مهما كان السعى وراء الطموح فإنه لا يتعارض مع الرضا ألا فى حالة السخط على الموجود و ليس فى حالة الرغبة فى الازدياد منه بمعنى رغبة فى زيادة علم ، ثقافة، مال ، فى حالة عدم السخط على الموجود و حب ما لك للأخرين أيضا فهو لا يتعارض مع الرضا
و لا يتعارض أيضا مع الاصلاح على كل المستويات و فى كل المجالات سياسيةو قانونية و إردارية و اجتماعية و ثقافية و لكن المشكلة فى إختلاف مفهوم الاصلاح ذاك من شخص لأخر و من قومية لقومية أخرى أو من جماعة لجماعة أخرى لا انه يبقى الإصلاح المحمود الذى يبغى الإصلاح دون السخط او التخريب
أما إذا دخل السخط من الباب هرب الرضا من الشباك و فى هذه الحالة مهما سعى الانسان وراء الازدياد فإنه لن يشبع و لن يصبه غير قدره الذى قدره الله له و نصيبه المكتوب فى اللوح المحفوظ
الرضا طالما صاحبه سعيا للالإضل واهداف للأحسن كان محمودا اما اذا كان خضوعا و استكانه ومهانه فهو ليس برضا و يبقى فى الحالة دى حاجة تانية خالص و كلنا عارفينها.....
فلنتوكل على الله حق توكله و نتقيه حق تقاته و نحيا طالبين الزيادة من الخير دون السخط على الموجود أو النظرإلى ما عند الاخرين
و لن يصيبنا إلا ما كتب الله لنا
اللهم ارزقنا الرضا و السكينة
و الزيادة من كل خير و السلامة من كل شر و الغنيمة من كل بر

حبة حروف:- قال رسول الله صلى الله عليه وسلم فيما يرويه عن ربه عز وجل: يا ابن آدم ! خلقتك لعبادتي فلا تلعب، وقسمت لك رزقك فلا تتعب؛ ورزفي أكثر منه فلا تطمع فإذا رضيت بما قسمت لك أرحت نفسك وكنت عندي محموداً، وإن لم ترض بما قسمت لك: فوعزتي وجلالي لأسلطن عليك الدنيا تركض فيها كما يركض الوحش في البرية، ولا تنال منها إلا ما قسمت لك، وكنت عندي مذموماً.)

( حديث قدسى) ملحوظة هذا الحديث يقال عنه إنه من الاسرائيليات و البعض الأخر يؤكد صحته و الله أعلى و اعلم
و لا نذكره إلا للعظة و العبرةو لوجه الله تعالى